Delhi in a Day ..

ഡല്‍ഹിയിലെ ഒരു വരേണ്യ കുടുംബത്തില്‍ നടക്കുന്ന ഒരു ദിവസത്തെ സംഭവം ആണ് പ്രമേയം. ആ കുടുംബത്തിലേക്ക് ഒരു വിദേശി അതിഥിയായി എത്തുന്നതും അയാളുടെ ബാഗില്‍ സൂക്ഷിച്ചിരുന്ന 3 ലക്ഷത്തോളം രൂപ കളവു പോകുകയും ചെയ്യുന്നു. ആ വീട്ടിലെ പൊതു അന്തരീക്ഷത്തില്‍ നിലനിന്ന സന്തുലനാവസ്ഥ  ഈ സംഭവം താറുമാറാക്കുന്നു. വീട്ടില്‍ കുടുംബനാഥനും ഭാര്യയും മകനും മകളും കൂടാതെ ഏതാനും ജോലിക്കാര്‍ ആണുള്ളത്. സ്വാഭാവികമായും അതിഥിയുടെ മുറി വൃത്തിയാക്കാനും മറ്റും കയറിയ വേലക്കാര്‍ തന്നെ സംശയത്തിന്റെ നിഴലില്‍ ആയി. (അത് ലോകതത്വം). തൊഴില്‍പരമായ സവിശേഷതകള്‍ , അടിമ ഉടമ ബന്ധങ്ങള്‍ തുടങ്ങി വര്‍ഗ്ഗപരമായ വിഷയങ്ങള്‍ സിനിമ ഉയര്‍ത്തുന്നുണ്ട്. ഏതൊരു വീട്ടിലും കളവു നടന്നാല്‍ സംശയത്തിന്റെ ദൃഷ്ടി വേലക്കാരില്‍ തന്നെ ആയിരിക്കും എന്നത് ഒരു സ്വാഭാവിക സംഭവമായി പൊതുസമൂഹം അംഗീകരിച്ചിരിക്കുന്നു. അതുകൊണ്ടുതന്നെ വീട്ടിലെ ഗൃഹനാഥയ്ക്ക് കുറ്റം ചാര്‍ത്താന്‍ മറ്റൊരാളെ തേടേണ്ടി വന്നില്ല. കളവു ചെയ്യപ്പെട്ട പണം തിരിച്ചു നല്‍കാന്‍ ഒരു യുവതി ഉള്‍പ്പെടെയുള്ള അടുക്കളയിലെ വേലക്കാര്‍ക്ക് 24 മണിക്കൂര്‍ സമയ പരിധി നിശ്ചയിക്കുകയും, അല്ലാത്തപക്ഷം (പോലീസ് നടപടി ഉള്‍പ്പെടെ) ഭവിഷ്യത്ത് അനുഭവിക്കുമെന്നു ഭീഷണിപ്പെടുത്തുകയും ചെയ്യുന്നുണ്ട്. അപ്പോഴും ഗൃഹനാഥന്‍ പറയുന്നത് വര്‍ഷങ്ങളായി സത്യസന്ധമായി ജോലി ചെയ്യുന്ന അവരെ സംശയിക്കുന്നത് പോലും ശരിയല്ലെന്നാണ്. കൂടാതെ പോലീസ് വരുന്നത് കുടുംബത്തിനു അഭിമാനക്ഷതം ആണെന്നും.. (അഭിമാനമെന്നതു പോലും വരേണ്യ വര്‍ഗ്ഗത്തിന് സ്വന്തം..)

നിരപരാധികള്‍ ആണെന്ന് ആവര്‍ത്തിച്ചു അവര്‍ ബോധിപ്പിക്കുന്നുന്ടെങ്കിലും അതൊന്നും സ്വീകരിക്കപ്പെടുന്നില്ല. അതോടൊപ്പം യുവതി ഉള്‍പ്പെടെയുള്ളവര്‍ ഇത്രയും തുക സംഘടിപ്പിക്കാന്‍ പല മാര്‍ഗ്ഗങ്ങളും തേടുന്നു. അങ്ങിനെയെങ്കിലും മോഷ്ടാക്കള്‍ എന്ന ദുഷ്പേര് ഇല്ലാതാക്കാന്‍... എല്ലാ ശ്രമങ്ങളും വിഫലമാകുന്നു. ഒരു ഘട്ടത്തില്‍ പണം നഷ്ടപ്പെട്ട അതിഥിയോട് ഞങ്ങള്‍ നിരപരാധികളാണെന്ന് നേരിട്ട് അറിയിക്കുന്നു. (അവതരിപ്പിക്കുന്നത്‌ അയാള്‍ക്ക്‌ പ്രത്യേക ഇഷ്ടം തോന്നുന്ന വേലക്കാരി പെണ്‍കുട്ടിയാണ്.)

അതോടൊപ്പം പണം മോഷ്ടിച്ചത് സ്വന്തം മകളാണെന്ന സത്യം കൊച്ചമ്മ അറിയുന്നു. മകളുടെ കാമുകന്റെ സാമ്പത്തിക പ്രയാസം പരിഹരിക്കാന്‍ മകള്‍ ചെയ്തതാണ്.. കുടുംബമഹിമയുടെ പ്രവാചകര്‍ ആയവര്‍ കുടുംബത്തിന്റെ മാനം നഷ്ടപ്പെടുമെന്നതിനാല്‍ അത് രഹസ്യമാക്കി വയ്ക്കുകയാണ്. വേലക്കാരില്‍ ആരെയെങ്കിലും കുറ്റവാളിയാക്കി കുടുംബത്തിന്റെ മാനം രക്ഷിക്കുക. മാനുഷികതയും സത്യവും പരാജയപ്പെടുന്ന അവസ്ഥ.. (അവിടെയും തൊഴിലാളിയുടെ മാനത്തെക്കാള്‍ വില മുതലാളിയുടെ മാനത്തിന് നിശ്ചയിക്കുന്ന മുതലാളിത്ത വ്യവസ്ഥയുടെ ആഖ്യാനം)..

അടുത്ത ദിവസം അതിഥി തിരിച്ചു പോകുന്നതിനു മുന്‍പേ എല്ലാവരും വിചാരണക്കായി ഡൈനിംഗ് റൂമില്‍ ഒത്തുകൂടുമ്പോള്‍ അപ്രതീക്ഷിതമായി തന്റെ പണം തിരിച്ചു കിട്ടിയതായി അതിഥി ഒരു പ്രഖ്യാപനം നടത്തുന്നു. ഇല്ലായിരുന്നെങ്കില്‍ അതിന്റെ പേരില്‍ ശിക്ഷിക്കപ്പെടാന്‍ സാധ്യതയുള്ളത് അയാള്‍ക്ക്‌ ഇഷ്ടപ്പെട്ട ആ പെണ്‍കുട്ടിയും അവളുടെ വളര്ത്തച്ഛനും ആകുമെന്ന് അയാള്‍ക്ക്‌ ബോധ്യമായിരിക്കാം. തികച്ചും മാനുഷികമൂല്യം ഉയര്‍ന്നു നിന്ന ഒരു പ്രതലം സൃഷ്ടിക്കപ്പെടുമ്പോഴും യഥാര്‍ത്ഥ കുറ്റവാളികള്‍ കുറ്റബോധത്തില്‍ നിന്നും മോചിതരാകുന്നുമില്ല. പണം അയാള്‍ക്ക്‌ തിരിച്ചു കിട്ടിയില്ലെന്ന് തിരിച്ചറിയാവുന്ന മൂന്നു പേര്‍ മാത്രമേ പ്രപഞ്ചത്തില്‍ ബാക്കിയുള്ളൂ.. അതിഥി, കളവു നടത്തിയ മകള്‍, അറിഞ്ഞിട്ടും രഹസ്യമാക്കി വച്ച അമ്മ..
ഇതില്‍ മാനുഷികമൂല്യം, വര്‍ഗ്ഗ താല്പര്യങ്ങള്‍ , ദല്‍ഹിയിലെ ഉള്ളവനും ഇല്ലാത്തവനും തമ്മിലുള്ള ജീവിതാന്തരങ്ങള്‍ , ഡല്‍ഹിയുടെ ദൃശ്യവൈവിധ്യങ്ങള്‍ ,നീതിയും നിയമവും പണാധിപത്യത്തിനു വഴങ്ങുന്നത് തുടങ്ങി പണം ഭൌതികാവസ്ഥകളില്‍ മാത്രമല്ല ഏതു സാമൂഹ്യാവസ്തകളുടെയും നിര്‍ണ്ണായക ഘടകമാണെന്ന വര്‍ത്തമാനകാല യാഥാര്‍ത്ഥ്യം വളരെ ലളിതമായി പ്രേക്ഷകനെ ബോധ്യപ്പെടുത്താന്‍ മലയാളിയായ പ്രശാന്ത് നായര്‍ക്ക്  ഒന്നര മണിക്കൂര്‍ ദൈര്‍ഘ്യമുള്ള മോശമല്ലാത്ത ഈ സിനിമയിലൂടെ സാധിച്ചിരിക്കുന്നു.

Dam 999 - ഒരു പരാജയം

ഇപ്പോള്‍ മുല്ലപ്പെരിയാര്‍ പ്രശ്നം കത്തി നില്‍ക്കുന്നതിനാല്‍ ഈ ഹോളിവുഡ് സിനിമ വിജയിക്കേണ്ടതായിരുന്നു. പക്ഷെ അത് ഉദ്ദേശിച്ച വിധം വിജയിച്ചിട്ടില്ല എന്നാണു എന്റെ അഭിപ്രായം. ഈ സിനിമ നിരോധിച്ച തനിഴുനാട് പോലും അതിന്റെ ഉള്ളടക്കം എന്തെന്ന് മനസ്സിലാക്കിയിട്ടില്ല. സിനിമയുടെ നാമവും ഇപ്പോഴത്തെ പ്രശ്നവും തമിഴ്‌നാടിന്റെ നിരോധനവും എല്ലാം കൂടിച്ചേര്‍ന്നു ഒരു വന്‍ പ്രതീക്ഷ പ്രേക്ഷകനില്‍ ഉണ്ടാക്കുന്നുണ്ടാവാം. ആ പ്രതീക്ഷ സിനിമ കാണുമ്പോള്‍ തകരുന്നു. അതിലെ ഡാം തകരുന്ന പോലെ.

111 മിനുട്ട് സിനിമയില്‍ ഡാം പ്രത്യക്ഷപ്പെടുന്നത് പോലും കേവലം 10 മിനുട്ടോളം മാത്രം. ഡാം ചോരുന്നതും തകരുന്നതും ജനങ്ങള്‍ രക്ഷക്കായി മലമുകളിലെ ചര്‍ച്ചില്‍ അഭയം തേടുന്നതും കുറെ പേര്‍ മരണപ്പെടുന്നതും മൃതദേഹങ്ങള്‍ നീക്കം ചെയ്യുന്നതും എല്ലാം 10 മിനുട്ടില്‍ താഴെ മാത്രം. ഒരിക്കലും ഒരു ഡാം ദുരന്തത്തിന്റെ തീവ്രതയോ ഗൌരവമോ പ്രേക്ഷകനിലേക്ക് പകരാന്‍ സിനിമയ്ക്ക് കഴിഞ്ഞിട്ടില്ല. അപകടം മുന്നില്‍ കാണുമ്പോള്‍ ജീവനക്കാര്‍ നടത്തുന്ന രക്ഷാശ്രമങ്ങളും മേയറോട് അതിനു അനുമതി തേടുമ്പോള്‍ ഉള്ള നിസ്സംഗതയും (ഭരണാധികാരികളുടെ നിസ്സംഗത) അവതരിപ്പിക്കുന്നുണ്ട്. പക്ഷെ യഥാര്‍ത്ഥത്തില്‍ സംവിധായകന് എവിടെയോ തെറ്റുപറ്റി. 50 കോടി മുടക്കിയ ഈ സിനിമയേക്കാള്‍ സംവിധായകന്‍ സോഹന്‍ റോയിയുടെ "DAMS -Lethal Water Bombs" എന്ന ഡോക്യുമെന്‍ററി ഇതിനേക്കാള്‍ ശക്തവും പ്രസക്തവും ആയിരുന്നു. ഒരു നിരൂപണത്തില്‍ പറഞ്ഞത്  "ഇതാണ് സിനിമ എന്ന് ജയലളിത അറിഞ്ഞാല്‍ തമിഴ് നാട്ടില്‍ സൌജന്യമായി പ്രദര്‍ശിപ്പിക്കാന്‍ അവസരം ഉണ്ടാക്കും" എന്നാണ്. മറ്റൊരാള്‍ പറഞ്ഞത് "ഇതിനേക്കാള്‍ നല്ലത് മുല്ലപ്പെരിയാര്‍ തകരുകയായിരുന്നു" എന്നാണ്. ഇത് Dam 999 അല്ല, DAMN ആണെന്നാണ്‌ വേറൊരു അഭിപ്രായം.

ഈ സിനിമ യഥാര്‍ത്തത്തില്‍ കൈകാര്യം ചെയ്യുന്നത് പ്രണയം, ജ്യോതിഷം, ആയുര്‍വ്വേദം, രാഷ്ട്രീയക്കാരന്റെ കുതന്ത്രം എന്നിവയാണ്. ഒരു ആറാം ഇന്ദ്രിയത്തിന്റെ സാന്നിധ്യം കൂടി ദൃശ്യവത്കരിക്കുന്നുണ്ട്. പ്രണയിക്കുന്ന യുവതിയും യുവാവും ഒന്നിക്കാന്‍ ശ്രമിച്ചാല്‍ അനര്‍ത്ഥങ്ങള്‍ ഉണ്ടാകുമെന്ന ജ്യോതിഷിയും ആയൂര്‍വ്വേദ ആചാര്യനുമായ സ്വന്തം പിതാവ് നല്‍കുന്ന മുന്നറിയിപ്പുകളെ അവഗണിക്കുന്ന ആദ്യ സന്ദര്‍ഭത്തില്‍ അമ്മ കുളത്തില്‍ മുങ്ങി മരിക്കുന്നു. രണ്ടാം ഘട്ടത്തില്‍ ഡാം തകരുന്നു. അല്ലാതെ കാലപ്പഴക്കമോ, മറ്റു സാങ്കേതികതയോ ആയിട്ടല്ല ഡാം തകരുന്നത് എന്നാണു സിനിമ നല്‍കുന്ന പാഠം. അന്ധവിശ്വാസം പ്രോത്സാഹിപ്പിക്കുന്ന വിധത്തില്‍ മിത്തുകളെ നെഗറ്റീവായാണ് ഉപയോഗിച്ചിരിക്കുന്നത്. ആയുര്‍വ്വേദത്തിന്റെ ഗുണവശങ്ങളെയും ഇന്ത്യന്‍ സംസ്കാരത്തിന്റെയും പാശ്ചാത്യ സംസ്കാരത്തിന്റെയും സങ്കലനത്തില്‍ മുഴച്ചു നില്‍ക്കുന്ന പ്രശ്നങ്ങളും വലിയ കുഴപ്പമില്ലാതെ പ്രതിപാദിച്ചിരിക്കുന്നു. അല്ലാതെ ഡാം തകര്‍ച്ചയും അതിന്റെ അനന്തരഫലങ്ങളും ചെറുതായി സ്പര്‍ശിച്ചു എന്ന് മാത്രം. അതുകൊണ്ട് ആ സിനിമ കാണുന്നവര്‍ അമിത പ്രതീക്ഷകള്‍ ഒഴിവാക്കുക. നിരാശരായ കാണികള്‍ തിയേറ്ററില്‍ അപശബ്ദങ്ങള്‍ ഉണ്ടാക്കിക്കൊണ്ടെയിരുന്നു. ഈ സിനിമ കാണുന്നവര്‍ ഡാമുമായി ബന്ധപ്പെട്ട പ്രശ്നങ്ങള്‍ അല്ല അതില്‍ പ്രതിപാദിക്കുന്നതെന്നും ഏതു ദുരന്തവും മുന്‍കൂട്ടി അറിയാന്‍ ജ്യോതിഷികള്‍ക്ക് ആവുമെന്ന കേവല വാദം മാത്രമാണ് അത് മുന്നോട്ട് വെക്കുന്നതെന്നും മനസ്സില്‍ കരുതി കാണാന്‍ പോയാല്‍ നിരാശ ഒഴിവാക്കാം..

ഇനി ഡാമുകളുടെ പ്രശ്നം കാണണമെന്ന് കരുതുന്നവര്‍ ഇതേ സംവിധായകന്റെ "DAMS -Lethal Water Bombs" എന്ന ഡോക്യുമെന്‍ററി കാണുക. അത് ശരിക്കും ഗംഭീരം തന്നെ.

ബ്ലാക്ക് സ്വാന്‍..

കഴിഞ്ഞ ഓസ്ക്കാറില്‍ ഏറ്റവും നല്ല നടിക്കുള്ള അവാര്‍ഡ് നതാലി പോര്‍ട്ട്മാന് (Natalie Portman) ലഭിച്ചത് ബ്ലാക്ക് സ്വാനിലെ അഭിനയത്തിനാണ്. അന്തര്‍ദേശീയ മേളകളില്‍ മറ്റു അവാര്‍ഡുകളും ബോക്സ് ഓഫീസ് ഹിറ്റായി മാറിയ ഈ സിനിമ നേടി. ഏറ്റവും നല്ല സിനിമക്കും സംവിധാനത്തിനുമുള്ള ഓസ്ക്കാര്‍ നോമിനേഷന്‍ ഡാരന്‍ ആരോനോവ്സ്കി (Darron Aronofsky) ചിട്ടപ്പെടുത്തിയ ഈ അമേരിക്കന്‍ സിനിമക്ക് ഉണ്ടായിരുന്നു.
സൈക്കോളജിക്കല്‍ ത്രില്ലര്‍ എന്നാണു ഇതിനെ വിശേഷിപ്പിക്കുന്നത്. പ്രസിദ്ധമായ ഒരു ബാലെ കമ്പനി അവരുടെ Swan Lake എന്ന ബാലേയിലെ വെള്ള അരയന്നത്തെയും കറുത്ത അരയന്നത്തെയും അവതരിപ്പിക്കാന്‍ അനുയോജ്യമായ ഒരാളെ തിരയുകയാണ്. ഏതൊരു ബാലെ കലാകാരിയുടെയും/കാലാകാരന്റെയും സ്വപ്നമാണ് അതിലെ ലീഡിംഗ് റോള്‍. ബാലെ സംവിധായകന്‍ Thomas Leroy കുറെ പേരില്‍ നിന്ന് നീന സെയേഴ്സ് (Nina Sayers) എന്ന യുവതിയെ തിരഞ്ഞെടുത്തതായി ഒരു പൊതുവേദിയില്‍ വെച്ച് പ്രഖ്യാപിക്കുകയാണ്. അതോടൊപ്പം അതുവരെ ട്രൂപ്പില്‍ മുഖ്യ നര്‍ത്തകിയായിരുന്ന Berth Macintyre ന്റെ വിരമിക്കല്‍ കൂടി തോമസ്‌ പ്രഖ്യാപിക്കുന്നതു പലരെയും അമ്പരിപ്പിച്ചു. (അതൊരു നിര്‍ബന്ധ വിരമിക്കല്‍ ആയിരുന്നുവെന്നു ബെര്‍ത്തിന്റെ തുടര്‍ന്നുള്ള പ്രതികരണത്തില്‍ നിന്ന് ബോധ്യമാകും).. ബാലെ നര്‍ത്തകിയായിരുന്ന നീനയുടെ അമ്മ എറിക്ക ഇരുപത്തെട്ടാം വയസ്സില്‍ നീനയെ ഗര്‍ഭം ധരിച്ചപ്പോള്‍ രംഗം വിടാന്‍ നിര്‍ബന്ധിതയായതാണ്.‌ അതുകൊണ്ട് തന്നെ അമ്മയും മകളും പുതിയ നിയോഗത്തില്‍ അമിതമായ സന്തോഷം അനുഭവിക്കുന്നു.
ആ വേദിയില്‍ ലഭിച്ച സ്വകാര്യതയില്‍ തോമസിന്റെ മുന്നില്‍ വെച്ചു നീനയോടു മുന്‍ ലീഡിംഗ് ആര്‍ട്ടിസ്റ്റ് ബെര്‍ത്ത് പൊട്ടിത്തെറിക്കുന്നു. തോമസിനെ അവിഹിതമായി സ്വാധീനിച്ചു തന്റെ സ്ഥാനം തട്ടിയെടുത്തെന്നായിരുന്നു ആരോപണം. അതിനിടെ ബെര്‍ത്ത് ഒരു കാര്‍ അപകടത്തില്‍ പെട്ട് ആശുപത്രിയില്‍ ആകുന്നു. തോമസ്‌ പറയുന്നത് അതൊരു ആത്മഹത്യാ ശ്രമം ആകാനാണ് സാധ്യത എന്നാണ്. ആശുപത്രി കിടക്കയില്‍ ബെര്ത്തിന്റെ ഒടിഞ്ഞ കാലുകള്‍ കണ്ട നീന മാനസികമായി അസ്വസ്ഥയാകുന്നു. (ഒരു പക്ഷെ ഇതിനു കാരണക്കാരി താനാണെന്ന ചിന്ത വേട്ടയാടുന്നുണ്ടാവാം )..

നിഷ്കളങ്കവും മനക്കട്ടിയില്ലാത്തതുമായ വെള്ള അരയന്നവും, കൌശലവും വിഷയാസക്തിയുള്ളതുമായ കറുത്ത അരയന്നവും.. റിഹേഴ്സല്‍ ഘട്ടങ്ങളില്‍ പലപ്പോഴും നീനക്ക് പ്രതീക്ഷക്കൊത്ത് ഉയരാനാവുന്നില്ല. അതിനിടയില്‍ കറുത്ത അരയന്നമാവാന്‍ കൂടുതല്‍ അനുയോജ്യമായ മറ്റൊരു യുവതിയും (ലില്ലി) എത്തുന്നു. ലില്ലിയെ കറുത്ത അരയന്നം ആക്കുന്നത് സംബന്ധിച്ച് തോമസ്‌ നീനയോട് സൂചിപ്പിക്കുന്നുണ്ടെങ്കിലും നീന നിഷേധഭാവം പ്രകടിപ്പിക്കുന്നു. ഒരു പക്ഷെ നീനക്ക് അവസരം നല്കാന്‍ മറ്റൊരാളെ ബോധപൂര്‍വ്വം ഒഴിവാക്കാന്‍ മടിക്കാത്ത ആളാണല്ലോ തോമസ് എന്ന ചിന്ത അവളെ പിന്തുടരുന്നുണ്ടാകാം‌.. തോമസുമായി ലില്ലി കാണിക്കുന്ന അടുപ്പവും,ആവശ്യമെങ്കില്‍ തനിക്കുള്ള പകരക്കാരിയാവാന്‍ തയ്യാറെടുക്കുകയാണെന്നതും നീനയെ അലോസരപ്പെടുത്തുന്നു. ലില്ലിയുമായി അസ്വാരസ്യം ഉണ്ടാകുകയും പിന്നീട് രണ്ടു പേരും നല്ല സൌഹൃദത്തില്‍ എത്തുകയും ചെയ്യുന്നു.
എങ്കിലും പലപ്പോഴും നീനയുടെ ചുറ്റും മായാദൃശ്യങ്ങള്‍ (Hallucination) വലയം വെക്കുന്നു. അവള്‍ക്കു ചുറ്റും പല അസാധാരണ സംഭവങ്ങള്‍ നടക്കുന്നു. ശരീരത്തില്‍ നിന്ന് ചോര പൊടിയുക, കാല്‍വിരലുകള്‍ ഒട്ടിപ്പിടിക്കുക, അമ്മയോട് പോലും പലതിനും വഴക്കിടുക, ലില്ലിയുമായി രതിയില്‍ ഏര്‍പ്പെടുക തുടങ്ങി പലതും.. ഇതില്‍ യാഥാര്‍ത്ഥ്യം ഏതെന്നു പ്രേക്ഷകനെ ആശയക്കുഴപ്പത്തില്‍ ആക്കും. ആദ്യ സ്റ്റേജ് പെര്‍ഫോമന്‍സിന്റെ തലേ ദിവസം ലില്ലിയുടെ കൂടെ ഒരു നൈറ്റ് ക്ലബ്ബില്‍ പോകുന്ന നീനക്ക് ഉത്തേജക ഗുളിക ജ്യൂസില്‍ കലര്‍ത്തി നല്‍കുന്നു. പിന്നീട് പല മായാദൃശ്യങ്ങളിലൂടെയും കടന്നു പോകുന്ന നീന കാലത്ത് ഉണരാന്‍ വൈകി. മകള്‍ക്ക് സുഖമില്ലെന്നു ട്രൂപ്പിലേക്ക് അമ്മ വിളിച്ചു പറഞ്ഞു. വൈകി എണീറ്റ നീന അമ്മയുടെ എതിര്‍പ്പ് വകവയ്ക്കാതെ ട്രൂപ്പുമായി ചേരാന്‍ കുതിക്കുകയാണ്. അവള്‍ക്കു പകരക്കാരിയാകാന്‍ വേഷം മാറിയ ലില്ലിയെ കാണുമ്പോള്‍ സര്‍വ്വ നിയന്ത്രണവും വിടുന്നു. സ്വയം ചമയങ്ങള്‍ അണിഞ്ഞു സ്റ്റേജില്‍ കയറാന്‍ തയ്യാറാണെന്ന് പറയുന്ന നീനയെ തോമസ്‌ തടഞ്ഞില്ല. നീനയുടെ വെള്ള അരയന്നത്തിന്റെ ആദ്യ രംഗം തന്നെ കാണികളില്‍ വിസ്മയം ഉണര്‍ത്തുന്നതും സഹകലാകാരന്മാരെ പോലും അതിശയിപ്പിക്കുന്നതും ആയിരുന്നു. തോമസ്‌ ആവേശം കൊണ്ട് നീനയെ ആലിംഗനം ചെയ്തു. രണ്ടാം ഭാഗമായ കറുത്ത അരയന്നത്തിനായി തയ്യാറായി ഇരിക്കുന്ന ലില്ലിയെ ഡ്രസ്സിംഗ് റൂമില്‍ കണ്ട നീന അവളെ ആക്രമിക്കുകയും പൊട്ടിച്ച കണ്ണാടി ചില്ല് കൊണ്ട് കുത്തിക്കൊല്ലുകയും ചെയ്യുന്നു. മൃതദേഹം ഒരു ബെഡ്ഷീറ്റ് കൊണ്ട് മൂടുന്നു. അതിനു ശേഷം വളരെ സമാധാനത്തോടെ അപാരമായ ചുവടുകളോടെ ശരീരത്തില്‍ കറുത്ത തൂവലുകള്‍ മുളക്കുന്ന, കൈകള്‍ ചിറകുകളായി രൂപാന്തരപ്പെടുന്ന വിധം നീന കറുത്ത അരയന്നമായി സ്റ്റേജില്‍ അവതരിച്ചു. അവസാന രംഗത്തിനായി വീണ്ടും വെള്ള അരയന്നമായി വേഷം മാറാന്‍ മുറിയില്‍ എത്തുന്ന നീന ഷീറ്റിനടിയില്‍ ലില്ലിയെ കാണുന്നില്ല. അപ്പോഴാണ്‌ സ്വന്തം വയറ്റില്‍ തറഞ്ഞു നില്‍ക്കുന്ന ചില്ലും അവിടെ നിന്ന് ചെറുതായി രക്തം പോടിയുന്നതും നീനയുടെ ശ്രദ്ധയില്‍ പെടുന്നത്. അത് വകവയ്ക്കാതെ അവള്‍ അവസാന രംഗം തകര്‍ത്താടി. വെള്ള അരയന്നം മറിഞ്ഞു വീഴുന്ന രംഗത്തോടെ കര്‍ട്ടന്‍ വീഴുന്നു. കാണികളുടെ നിലക്കാത്ത കരഘോഷം, സഹകലാകാരന്മാര്‍ മുഴുവന്‍ അഭിനന്ദനങ്ങള്‍ കൊണ്ട് മൂടുന്നു, കൂട്ടത്തില്‍ ലില്ലിയും ഉണ്ട്.. (യഥാര്‍ത്ഥത്തില്‍ എല്ലാം നീനയുടെ hallucination ന്റെ ഭാഗമായിരുന്നു.. പ്രതിഷേധവും കുറ്റബോധവും അവളെ സ്വയം പീഡനത്തിലെത്തിക്കുകയാണ് എന്ന് പ്രേക്ഷകരിലേക്ക് പകരാന്‍ അവസാനരംഗം ധാരാളം മതി..) നീനയുടെ അവതരണത്തെ ഓരോരുത്തരും PERFECT എന്നാണു പറഞ്ഞത്. ആ പൂര്‍ണ്ണതയില്‍ എത്തിയ പെര്‍ഫോമന്‍സിന് ശേഷം അവളുടെ ജീവിതത്തില്‍ ഇനി ഒന്നും ബാക്കിയില്ല.. അവള്‍ കൊതിച്ച നൃത്തം, എല്ലാവരുടെയും സ്നേഹം, കൈവിട്ടു പോകുമെന്ന് തോന്നിയതെല്ലാം എത്തിപ്പിടിച്ച സാഫല്യം..അതുകൊണ്ടാവാം വയറ്റിലെ മുറിവില്‍ നിന്ന് രക്തം വാര്‍ന്നു അബോധാവസ്ഥയിലേക്ക് മറയുമ്പോഴും " I AM PERFECT ..." എന്ന് മന്ത്രിച്ചു കൊണ്ട് സംതൃപ്തി നിറഞ്ഞ മുഖവുമായി ഇനിയൊന്നും എനിക്ക് ആവശ്യമില്ലെന്ന് കാണികളോടും ലോകത്തോട്‌ മുഴുവനും പറയുന്നത് പോലെ..
ഫാന്റസിയും റിയാലിറ്റിയും ഇഴപിരിക്കാനാവാത്ത വിധം സന്നിവേശിപ്പിച്ച അവതരണ രീതി പ്രേക്ഷകനെയും ഒരു മായികലോകത്തിലേക്ക് എത്തിക്കുന്ന നിരവധി സന്ദര്‍ഭങ്ങള്‍.. നതാലി പോര്‍ട്ട്മാന്റെ അഭിനയം അപാരം തന്നെ.. സിനിമക്കായി ബാലെ 8 മാസത്തോളം അവര്‍ പരിശീലിക്കുകയുണ്ടായി.. കഥാപാത്രവത്കരണം വളരെ നന്നായി.

അഴിമതിയും ഹസാരെയും സര്‍ക്കാരും..

അന്ന ഹസാരെയുടെ അഴിമതിക്കെതിരെ ഉള്ള നിരാഹാര സമരം 22 നിബന്ധനകള്‍ ചുമത്തി സര്‍ക്കാര്‍ തടഞ്ഞു എന്ന് പറയുന്നതിനേക്കാള്‍ നല്ലത് "നിരോധിച്ചു" എന്നാവും.. ഇത്തരം നിബന്ധനകള്‍ സ്വാതന്ത്ര്യ സമരത്തിനും ഗാന്ധിജിയുടെ നിരാഹാര സമരത്തിനും ‌എതിരെ ബ്രിട്ടീഷുകാര്‍ പോലും ഏര്‍പ്പെടുതിയിരുന്നില്ല.. ഇത് പറയാതെ നടത്തുന്ന അടിയന്തരാവസ്ഥയാണ്.. എന്താണ് ഈ ഇന്ത്യയുടെ അവസ്ഥ.. ഹസാരെയുടെ പുറകില്‍ ഇപ്പോള്‍ ബി.ജെ.പി. കൂടിയോ മറ്റു വിഭാഗങ്ങള്‍ ഉണ്ടോ എന്നതല്ല യഥാര്‍ത്ഥ പ്രശ്നം.. അദ്ദേഹം ഉയര്‍ത്തിയ മുദ്രാവാക്യം ശരിയാണോ..? ആവശ്യങ്ങള്‍ ന്യായമാണോ..? പാര്‍ലമെന്റിന്റെ അധികാരത്തില്‍ കൈ കടത്തലാണോ..? അദ്ദേഹം അഴിമാതിക്കാരന്‍ ആണെന്ന മറുവാദം ശരിയോ..?
1 . അഴിമതി തടയുക എന്ന ആവശ്യം ആര് തള്ളിയാലും ഇന്ത്യന്‍ ജനത തള്ളില്ല.. അത്രയും ഞെട്ടിക്കുന്ന വിവരങ്ങള്‍ ദിനം പ്രതി നാം കേള്‍ക്കുന്നു..
2 . ലോക്പാല്‍ ബില്ലില്‍ പ്രധാനമന്ത്രിയെയും ഉള്‍പ്പെടുത്തണം.. പ്രധാനമന്ത്രി സ്ഥാനം വഹിക്കുന്ന കാലത്തോളം അദ്ദേഹം ബില്ലിന്റെ പരിധിക്കു പുറത്താണ്.. അതായത് സഹപ്രവര്‍ത്തകര്‍ കുറ്റവാളികളാകുമ്പോള്‍ അദ്ദേഹം ഒഴിവാകും.. പ്രതിസ്ഥാനത്ത് വരേണ്ട ഒരാള്‍ പുറത്തായാല്‍ കേസ് ദുര്‍ബലമാകും.. പിന്നീട് PM സ്ഥാനം ഒഴിയുന്നത് വരെ കാത്തിരിക്കണം.. അതുവരെ അധികാരത്തില്‍ ഇരുന്നു സഹപ്രവര്‍ത്തകരെ രക്ഷിക്കാന്‍ PM നു കഴിയുന്നു.. ഈ അവസ്ഥ മാറണമെന്നാണ് ഹസാരെ പറയുന്നത്.. (ഇടതുപക്ഷവും ഈ ആവശ്യം ഉന്നയിച്ചു)
3 . നിരാഹാരമെന്നത് (കൊണ്ഗ്രസ്സുകാര്‍ മറന്നുപോയ) തികച്ചും ഗാന്ധിയന്‍ രീതിയിലുള്ള സമരമാണ്.. അതിനെ എന്തിനു ഭയക്കണം..?
4 . ബില്ലും നിയമവും പാസാക്കാനുള്ള അധികാരം പാര്‍ലിമെന്റിനാണ്.. അതില്‍ ഹസാരെ കൈകടത്തുന്നത് ശരിയല്ല എന്നാണ് സര്‍ക്കാര്‍ വാദം.. ഇത് ജനപക്ഷത്ത് നിന്നുള്ള ബില്ലാണ്.. അല്ലെങ്കിലും 'ഞങ്ങള്‍ എന്തും ചെയ്യും നിങ്ങളാരാ ചോദിക്കാന്‍' എന്നാ തരത്തില്‍ നിയമം ഉണ്ടാകാനാവുമോ..?

5 . ഹസാരെ അഴിമാതിക്കാരന്‍ ആണെങ്കില്‍ നടപടി എടുക്കാന്‍ എന്തിനു കാത്തു നില്‍ക്കണം..? ഇന്ന് അറസ്റ്റ് ചെയ്യാന്‍ കാണിച്ചത്തിന്റെ പകുതി ഉത്സാഹം മതിയായിരുന്നല്ലോ..?

   യഥാര്‍ത്ഥ വസ്തുത ഇതൊന്നുമല്ലെന്ന് കാണുകയും കേള്‍ക്കുകയും ചെയ്യുന്ന ജനങ്ങള്‍ക്ക്‌ മനസ്സിലാവും.. ഇപ്പോള്‍ ഹസാരെയുടെ സമരം രാജ്യമാകെ വ്യാപിക്കാന്‍ സാധ്യതയുണ്ട്.. ഇപ്പോള്‍ തന്നെ 2-ജി സ്പെക്ട്രത്തില്‍ PM നെയും ചിദംബരത്തെയും ഉള്‍പ്പെടുത്തേണ്ട അവസ്ഥയിലാണ്.. അത് സര്‍ക്കാരിന്റെ പതനതിലെത്തും.. അതുകൊണ്ടാണ് ഈ അപ്രഖ്യാപിത അടിയന്തരാവസ്ഥ..ഇത് ലോകത്തിലെ ഏറ്റവും വലിയ ജനാധിപത്യ രാഷ്ട്രത്തിന് ഭൂഷണമല്ല.. ഒരു സമരത്തെ പോലും ഭയക്കുന്ന ഭരണകൂടം ആണെങ്കില്‍ രാജി വെച്ച് പുറത്ത് പോകുകയാണ് അഭികാമ്യം..

127 Hours..

വളരെ ചെറിയ ഒരു വിഷയത്തെ (small thread) പ്രേക്ഷകനെ ആകാംക്ഷയുടെ മുള്‍മുനയില്‍ നിര്‍ത്തുന്ന വിധത്തില്‍ അവതരിപ്പിക്കുകയും ഒന്നര മണിക്കൂര്‍ ദൈര്‍ഘ്യമുള്ള സാങ്കേതികത്തികവാര്‍ന്ന ഒരു സൃഷ്ടിയായി സാക്ഷാത്കരിക്കുകയും ചെയ്ത ഡാനി ബോയലിനെ പരിചയമില്ലാത്ത ഇന്ത്യക്കാര്‍ കറവായിരിക്കും.. ഓസ്കാര്‍ അവാര്‍ഡുകള്‍ വാരിക്കൂട്ടിയ സ്ലം ഡോഗ് മില്ലെനയര്‍ എന്ന സിനിമയുടെയും സംവിധായകനാണ് അദ്ദേഹം..

വളരെ രസകരമായ, സന്തോഷകരമായ യാത്രക്കിടയില്‍ ഒരു യുവാവിനു സംഭവിക്കുന്ന ലളിതമായ അപകടം സങ്കീര്‍ണ്ണമാകുന്നതും യാദൃഛിക തലങ്ങളിലേക്കു ഗതി മാറുന്നതും എല്ലാം ദൃശ്യവത്കരണത്തിന്റെ വൈവിധ്യത്തിലൂടെ സന്നിവേശിപ്പിച്ചിരിക്കുന്നു. Ralston's autobiography എന്ന കൃതിയെ ആസ്പദമാക്കിയാണ് ഈ സിനിമ ചിട്ടപ്പടുത്തിയത്.വെളിച്ചത്തെ പോലും പ്രതീക്ഷയുടെ പ്രതീകമാക്കിയ സന്ദര്‍ഭം കാഴ്ചക്കാരനിലും പ്രതീക്ഷയുണര്‍ത്തുന്നുണ്ട്.. ആറു അക്കാദമി അവാര്‍ഡുകള്‍ക്ക് ഈ സിനിമ നോമിനേറ്റ് ചെയ്യപ്പെട്ടു.
ഇത്തരം പ്രമേയങ്ങള്‍ (ചെറിയ ത്രഡ് വികസിപ്പിക്കുന്ന രീതി) ലോകസിനിമകളിലും ഇന്ത്യന്‍ സിനിമകളിലും മലയാള സിനിമകളിലും മുന്‍പും ഉണ്ടായിട്ടുണ്ട്. ഏറ്റവും അവസാനം വന്ന ട്രാഫിക് എന്ന സിനിമയെ ഇതുമായി താരതമ്യം ചെയ്യാനാവില്ലെങ്കിലും ചെറിയ ത്രഡ്ഡിനെ മറ്റു പലതുമായും കൂട്ടിയിണക്കുന്നുണ്ട്.

ഈ സിനിമയില്‍ സാഹസിക മലകയറ്റത്തിനിടയില്‍ ഒരു വ്യക്തിയ്ക്കു സംഭവിക്കുന്ന അപകടവും രക്ഷാശ്രമങ്ങളുമാണ് ചിത്രീകരിച്ചിട്ടുള്ളത്.
ഒറ്റയ്ക്കുള്ള മലകയറ്റത്തിനിടയില്‍ ആഴത്തിലുള്ള പാറയിടുക്കിലൂടെ അള്ളിപ്പിടിച്ച് താഴേക്കു ഇറങ്ങുന്ന യുവാവിന്റെ വലതുകൈ ഒരു പാറക്കിടയില്‍ കുടുങ്ങുകയണ്. അതില്‍ നിന്നു രക്ഷപ്പെടാന്‍ സ്വയം നടത്തുന്ന ശ്രമങ്ങള്‍.. ആദ്യം വളരെ നിസ്സാരമെന്ന വിധത്തിലുള്ള സമീപനം.. ഓരോ ശ്രമവും പരാജയപ്പെടുമ്പോള്‍ അതു പിന്നീട് അതിജീവനത്തിനുള്ള ശ്രമമായി രൂപാന്തരപ്പെടുന്നത്.. അതിനിടയില്‍ പ്രകൃതിയുടെ പരീക്ഷണങ്ങള്‍.. അനാഥമായിപ്പോകുന്ന അലര്‍ച്ചകള്‍.. വ്യര്‍ത്ഥമാകുന്ന സ്വന്തം രക്ഷാശ്രമങ്ങള്‍.. വായുവില്‍ മുങ്ങിയ സഹായ അഭ്യര്‍ത്ഥനകള്‍.. എല്ലാം എല്ലാം നിഷ്ഫലമായ നിരാലംബമായ ദുരിതത്തിന്റെ മണിക്കൂറുകള്‍..ഭക്ഷണമില്ലാതെ വെള്ളം പോലും തീര്‍ന്ന നിസ്സഹായാവസ്ഥ.. ശരീരത്തിലെ രക്തം പോലും ദാഹം ശമിപ്പിക്കാന്‍ ഉപകരിക്കുന്ന ദയനീയാവസ്ഥ.. ആ പാറയിടുക്കിനുള്ളില്‍ തന്നെ ജീവിതം അവസാനിക്കുമെന്ന ഘട്ടത്തില്‍, അനിര്‍വചനീയമായ മാനസികാവസ്ഥയില്‍ ഒരേയൊരു മാര്‍ഗ്ഗം മാത്രമേ ആ യുവാവിന്റെ മുന്നില്‍ ഉണ്ടായിരുന്നുള്ളൂ.. ജീവനു പകരം ജീവനൊഴിച്ച് എന്തും സമര്‍പ്പിക്കാമെന്നു ദൈവത്തോട് കേണപേക്ഷിക്കുന്ന നിസ്സഹായവസ്ഥയില്‍ അതു അയാള്‍ ചെയ്തു..
(എന്തായിരിക്കാമത്..? നിങ്ങളും ഞാനുമാണെങ്കിലും അതു ചെയ്യുമോ..?)
രക്ഷപ്പെടലിന്റെ ആശ്വാസം.. കാഴ്ചയിലേക്കെത്തുന്ന ആകാശം..

ഡാനി ബോയല്‍ വളരെ സുന്ദരമായി ഇതില്‍ ദൃശ്യഭാഷ ഒരുക്കിയിരിക്കുന്നു (പുത്തന്‍ വ്യാകരണം അല്ലെങ്കില്‍ പോലും).. സിനിമ നല്‍കുന്ന സന്ദേശം എന്തെന്നു ചോദിച്ചാല്‍ കൃത്യമായ ഒരു ഉത്തരം തരുന്നില്ല. എന്നാല്‍ സിനിമയെന്ന മാധ്യമത്തിന്റെ നൂതന സാങ്കേതികതയും അനന്തസാധ്യതയും വ്യക്തമാക്കുന്ന സൃഷ്ടിയാണിതെന്നു പറയാം..പ്രമേയത്തിന്റെ ശക്തിയും കെട്ടുറപ്പും അപാരമാണ്..അതാണ് അതിന്റെ സവിശേഷതയും..
See this link also http://www.imdb.com/video/screenplay/vi1403951897/

The King's Speech (Oscar)

The King's Speech...
അവസാനം കണ്ട സിനിമ The King's Speech..
2011ലെ ഓസ്കാറില്‍ നാല് അവാര്‍ഡുകള്‍ നേടിയ സിനിമ..
ഏറ്റവും നല്ല സിനിമ, മികച്ച സംവിധായകന്‍ (Tom Hooper), മികച്ച നടന്‍ (Colin Firth), മികച്ച തിരക്കഥ (David Seidler) എന്നിവയായിരുന്നു അവാര്‍ഡുകള്‍..
118 മിനുറ്റ് ദൈര്‍ഘ്യമുള്ള ഈ സിനിമ രണ്ടു തവണ കണ്ടു..
ഒറ്റ വാചകത്തില്‍ പറഞ്ഞാല്‍ ബ്രിട്ടണിലെ ജോര്‍ജ്ജ് VI-മന്റെ കിരീടധാരണവും ജീവിതത്തിലെ പ്രധാന സംഭവവും ആണ് പ്രമേയം.. സാധാരണ കാണുന്ന രാജാവും പട്ടാളവും എതിരാളികളും യുദ്ധവും വാളും പരിചയും ഒന്നുമില്ലാതെ രാജാവിന്റെ വ്യക്തിപരമായ (വിശാലാര്‍ത്ഥത്തില്‍ രാഷ്ട്രീയവും ആയ) ഒരു വിഷയത്തെ ഒതുക്കത്തോടെ അവതരിപ്പിച്ചിരിക്കുന്നു..
തന്റെ അഞ്ചാം വയസ്സിനിടയില്‍ വന്നുപെട്ട വിക്കും അതിനെത്തുടര്‍ന്നുണ്ടാകുന്ന സദസ്സിനെ അഭിമുഖീകരിക്കാനുള്ള ധൈര്യമില്ലായ്മയും ബെര്‍ട്ടിയെന്നു വിളിക്കുന്ന രാജകുമാരനെ രാജാവാകാന്‍ പറ്റാത്തവനെന്ന ധാരണ പൊതുവില്‍ സൃഷ്ടിച്ചു. അത് അദ്ദേഹത്തില്‍ അപകര്‍ഷതാബോധം വളര്‍ത്തി..


ഒരു വലിയ എക്സിബിഷന്റെ സമാപനചടങ്ങില്‍ പിതാവിന്റെ (ജോര്‍ജ്ജ് V-മന്‍) സന്ദേശം വായിക്കാന്‍ നിയുക്തനാകുന്ന ബെര്‍ട്ടി വല്ലാത്ത പ്രതിസന്ധിയിലാകുകയാണ്.. കേള്‍വിക്കാരും പ്രാസംഗികനും ഒരു പോലെ നിസ്സഹായരായ സന്ദര്‍ഭം.. വാക്കുകള്‍ വരാതെ തൊണ്ടയില്‍ കുരുങ്ങുന്നത് കാണികളുടെ തൊണ്ടയിലേക്കു കൂടി പകരുന്ന അവതരണ രീതിയും വിഷ്വലൈസേഷനും അഭിനയമികവും അപാരമാണ്.. അഞ്ചാം വയസ്സു മുതല്‍ നേരിട്ട അവഗണനയുടേയും തിരസ്കരണത്തിന്റേയും അപമാനത്തിന്റേയും നിഴലുകള്‍ ബെര്‍ട്ടിയുടെ ജീവിതത്തെ പിന്തുടരുകയാണ്.. അതില്‍ നിന്നു മുക്തനാകാനാവാതെ സഭാകമ്പവും സംസാരവൈകല്യവും അദ്ദേഹത്തെ വേട്ടയാടുന്നു..
അദ്ദേഹത്തിന്റെ ഈ വൈകല്യം ഭേദമാക്കാന്‍ വിവിധ ഡോക്ടര്‍മാരെ മാറി മാറി പരീക്ഷിക്കുന്നുണ്ടെങ്കിലും പ്രശ്നം പരിഹരിക്കപ്പെടുന്നില്ല.. യാഥാസ്ഥിതിക ചികിത്സാ സമ്പ്രദായത്തോട് ക്ഷിപ്രകോപിയായ ബെര്‍ട്ടിക്ക് സമരസപ്പെടാനും കഴിയുന്നില്ല.. അതിനുള്ള ക്ഷമയും അദ്ദേഹത്തിനില്ല.. ബെര്‍ട്ടിയുടെ ഭാര്യ എലിസബത്ത് അദ്ദേഹത്തിന്റെ ഈ വൈകല്യം മാറുന്നതിനായി വല്ലാതെ ആഗ്രഹിക്കുകയും അതിനു വേണ്ടി പിന്തുണയേകുകയും ചെയ്യുന്നുണ്ട്..

അതിനിടയില്‍ കിരീടാവകാശിയായ എഡ്വെര്‍ഡ്(ബെര്‍ട്ടിയുടെ സഹോദരന്‍) തന്റെ നിയോഗം ഏറ്റെടുക്കാന്‍ വിസമ്മതിക്കുന്നു. അയാള്‍ വിവാഹം കഴിക്കാന്‍ ആഗ്രഹിക്കുന്നത് വിവാഹമോചിതയായ ഒരു അമേരിക്കക്കാരിയെയാണ്.. ഭരണാധികാരിയായ രാജാവാണ് നിയമപരമായി ചര്‍ച്ച് ഓഫ് ഇംഗ്ലണ്ടിന്റെ തലവന്‍.. ചര്‍ച്ചിന്റെ തലവനാകുന്നയാള്‍ക്ക് വിധവയെ വിവാഹം കഴിക്കാന്‍ അനുവാദമില്ല. സവിശേഷ അധികാരങ്ങളുള്ള രാജാക്കന്മാര്‍ക്ക് സാധാരണ പൗരന്മാര്‍ക്കുള്ള പല അവകാശങ്ങളും നിഷേധിക്കപ്പെട്ടിരിക്കുന്നുവെന്നു സിനിമ നമ്മെ ഓര്‍മ്മപ്പെടുത്തുന്നു.

ഇതിന്റെയെല്ലാം പരിഹാരമായി കിരീടം ബെര്‍ട്ടിയുടെ തലയില്‍ വന്നുചേരുന്നു. ബെര്‍ട്ടിയുടെ സമ്മതമില്ലായെങ്കിലും വേറെ മാര്‍ഗ്ഗമില്ലായിരുന്നു. ഇതു വല്ലാത്തൊരു പ്രതിസന്ധിയിലേക്കു രാജ്യത്തെ എത്തിച്ചു. പ്രത്യേകിച്ചും ഹിറ്റ്ലറുമായിട്ടുള്ള ഒരു യുദ്ധമുഖത്ത് രാജ്യം നില്കുമ്പോള്‍.. അണികളെ അഭിസംബോധന ചെയ്യാനാകാത്ത രാജാവ് എന്നത് സങ്കല്പിക്കാനാകാത്തതാണ്.. ഈ പ്രതിസന്ധിയില്‍ നിന്നു ബെര്‍ട്ടിയെ കരകയറ്റാന്‍ യാഥാസ്ഥിതികനല്ലാത്ത സ്പീച് തെറാപ്പിസ്റ്റിന്റെ സേവനം പ്രയോജനപ്പെടുത്തുകയാണ്.. അദ്ദേഹത്തിന്റെ പുതിയ എക്സര്‍സൈസുകളും രീതികളും അസ്വസ്ഥനാക്കുന്നുണ്ടെങ്കിലും ബെര്‍ട്ടി സാവകാശം ലയണല്‍ ലോഗ് എന്ന പരിശീലകനോട് അടുക്കുന്നു.. ഒരു രാജകുടുംബാംഗമെന്ന പരിഗണന ലോഗ് നല്കുന്നില്ല.. തിരുമനസ്സ് എന്നു വിളിക്കുന്നതിനു പകരം ബെര്‍ട്ടി എന്നാണ് വിളിക്കുന്നത്. അയാളുടെ സംസാരവൈകല്യത്തിനു പിന്നിലുള്ള മാനസിക പ്രശ്നം കണ്ടെത്തണമെങ്കില്‍ ചികിത്സകനു രോഗിയുടെ മേല്‍ ആധിപത്യം അനിവാര്യമായതിനാലാണ് അങ്ങിനെ വിളിക്കേണ്ടി വരുന്നത്.. അസഹിഷ്ണുതയുടെ രാജാവായ ബെര്‍ട്ടിയും ക്ഷമയുടെ രാജാവായ ലോഗും ഒന്നിച്ചുള്ള രംഗങ്ങള്‍ അതിഗംഭീരം തന്നെ.. അഭിനയത്തില്‍ ആരു ആരെ കവച്ചുവയ്ക്കുന്നുവെന്നു പറയാനാവുന്നില്ല.. ചികിത്സയുടെ പല ഘട്ടങ്ങളിലും ബെര്‍ട്ടി പൊട്ടിത്തെറിക്കുന്നുണ്ടെങ്കിലും അവസാനം മയപ്പെടുകയും ലോഗിന്റെ ചികിത്സ വിജയിക്കുകയും ചെയ്യുന്നു.. യുദ്ധത്തിനു കാതോര്‍ത്തിരിക്കുന്ന ജനതയോടു തന്മയത്വത്തോടെ അവര്‍ കേള്‍ക്കാന്‍ കൊതിച്ച വാക്കുകള്‍ റേഡിയോയിലൂടെ ഒഴുകിയപ്പോള്‍ സഹധര്‍മ്മിണി എലിസബത്തിന്റെ മുഖത്തെ ഭാവഭേദങ്ങള്‍, ഓരോരുത്തരുടേയും ഭാവങ്ങള്‍ ആ രാജ്യത്തിന്റെ സന്തോഷം പ്രകടമാക്കുന്നുണ്ടായിരുന്നു..
ആ പ്രഭാഷണത്തിനു ശേഷം വിജയശ്രീലാളിതനായി റെക്കോര്‍ഡിംഗ് റൂമില്‍ നിന്നു പുറത്തു വരുന്ന ജോര്‍ജ്ജ് ആറാമന്റെ ഗാംഭീര്യം.. നടത്തത്തിന്റെ ശൈലി.. കൈകള്‍ വീശുന്ന രീതി.. തോളിന്റെ ചലനം വരെ ഒരു രാജാവിന്റെ സമ്പൂര്‍ണ്ണതയെ ദൃശ്യവത്കരിക്കുന്നതായിരുന്നു.. അഭിനയത്തില്‍ ബെര്‍ട്ടിയായി വന്ന Colin Firth തന്നെ മുന്നില്‍.. അഭിനയത്തിലെ സ്വാഭാവികത കഥാപാത്രങ്ങള്‍ക്കു അസാമാന്യമാം വിധം ജീവന്‍ നല്കിയെന്നു മാത്രമല്ല, സിനിമ മുന്നോട്ടു വയ്ക്കുന്ന കഥാസന്ദര്‍ഭത്തിലെ ഭാഗമായി കാണികള്‍ മാറുകയും ചെയ്യുന്നുവെന്നതാണ് യാഥാര്‍ത്ഥ്യം.. ഓരോ കഥാപാത്രത്തിനും അനുയോജ്യരായവരെ തിരഞ്ഞെടുത്തതില്‍ സംവിധായകന്‍ മുഴുവന്‍ മാര്‍ക്കും നേടിയിട്ടുണ്ട്..

ആണവറിയാക്റ്ററുകളുടെ സുരക്ഷ..

ജപ്പാനില്‍ ഭൂകമ്പവും സുനാമിയും അഗ്നിപര്‍വതങ്ങളുമെല്ലാം സൃഷ്ടിച്ചുകൊണ്ടിരിക്കുന്ന ദുരന്തങ്ങളേക്കാളേറെ ദുരന്ത സാധ്യത കല്പിക്കപ്പെടുന്നത് സ്ഫോടനം നടന്നുകൊണ്ടിരിക്കുന്ന ആണവറിയാക്റ്ററുകളില്‍ നിന്നുണ്ടാകുന്ന അണുപ്രസരണമായിരിക്കുമെന്നാണ് വാര്‍ത്തകള്‍ വ്യക്തമാക്കുന്നത്.. ബി.ബി.സി പോലുള്ള ചാനലുകളും അന്താരാഷ്ട്ര ആണവോര്‍ജ്ജ ഏജന്‍സിയുടെ വാര്‍ത്താവിഭാഗവും ഈ ആശങ്ക പങ്കുവയ്ക്കുകയുണ്ടായി.. അതില്‍ നിന്നുണ്ടാകാന്‍ സാധ്യതയുള്ള അപകടം വരും തലമുറകളെക്കൂടി ബാധിക്കുമെന്നാണ് വിദഗ്ദാഭിപ്രായം.. ആണവ സാങ്കേതിക വിദ്യയിലും അതിന്റെ പ്രയോഗത്തിലും എത്രയോ മുന്നിലുള്ള ജപ്പാനു പോലും അതിന്റെ ദുരന്തം തടയാനാവുന്നില്ല എന്നത് സാങ്കേതികവിദ്യയിലും പ്രയോഗത്തിലും 25 വര്‍ഷമെങ്കിലും പുറകിലുള്ള ഇന്ത്യയുള്‍പ്പെടെയുള്ള ആണവോര്‍ജ്ജസാധ്യതയെ ഉപയോഗപ്പെടുത്താന്‍ ഇപ്പോള്‍ ശ്രമിക്കുന്ന രാജ്യങ്ങള്‍ ഗൗരവമായി പുനര്‍വിചിന്തനം നടത്തേണ്ട കാലമായിരിക്കുന്നു.. ആണവനിലയങ്ങള്‍ സ്ഥാപിക്കുകയും ഉല്പാദിപ്പിക്കുകയും ചെയ്യുന്ന അമേരിക്ക ഉള്‍പ്പെടെയുള്ള വികസിത രാജ്യങ്ങള്‍ പോലും ആണവനിലയങ്ങള്‍ സ്ഥാപിക്കാന്‍ തയ്യാറല്ല. ഇപ്പോള്‍ ഇന്ത്യയില്‍ സ്ഥാപിക്കാന്‍ ഉദ്ദേശിച്ച നിലയങ്ങളില്‍ ഒന്ന് കന്യാകുമാരിക്കടുത്താണ്.. ഒരു ചാനല്‍ ചര്‍ച്ചയില്‍ കേട്ടത് കന്യാകുമാരിയില്‍ സ്ഥാപിക്കാന്‍ പോകുന്ന റിയാക്റ്റര്‍ തകര്‍ന്നാല്‍ കേരളത്തിന്റെ ഇങ്ങേയറ്റം വരെ അതിന്റെ ദുരന്തം എത്തുമെന്നാണ്..

അത്തരം ദുരന്തങ്ങള്‍ ഉണ്ടായാല്‍ വെന്തു മരിക്കുന്നത് മലയാളിയോ തമിഴനോ തെലുങ്കനോ ഇടതുപക്ഷമോ വലതുപക്ഷമോ അതിനു രണ്ടിനും ഇടയിലുള്ള പക്ഷമോ ഹിന്ദുവോ മുസ്ലിമോ കൃസ്ത്യനോ പാഴ്സിയോ ആണോ എന്നതായിരിക്കരുത് നമ്മെ നയിക്കുന്ന വികാരം.. അത്തരം നഷ്ടം അനുഭവിക്കുന്നവരും അവരുടെ പിന്‍ഗാമികളായ ഭാവിതലമുറയും ഭാരതീയരാണെന്നതാവണം ആ വികാരം.. അത്തരം ഒരു ചിന്ത നമ്മെ നയിക്കുന്നുവെങ്കില്‍ എനിക്കും നിങ്ങള്‍ക്കും നമ്മുടെ സഹോദരങ്ങള്‍ക്കുമാണ് ജപ്പാന്റെ ഇന്നത്തെ അവസ്ഥയുണ്ടാവാന്‍ പോകുന്നത്..

അത്തരം ഒരു ദുരന്തം താങ്ങാനുള്ള ശേഷി ഇന്ത്യന്‍ ജനതക്കില്ല.. ഭോപ്പാല്‍ ദുരന്തം പോലും നമുക്കുണ്ടാക്കിയ ക്ഷതം എത്ര ഭീകരമാണെന്നു അനുഭവിച്ചവര്‍ക്കു മാത്രമല്ല, അവിടെ പോയി കണ്ടവര്‍ക്കും ബോധ്യമായിട്ടുണ്ടാകും.. ഇതിനര്‍ത്ഥം നാം ശിലായുഗത്തിലേയ്ക്കു പോകണമെന്നല്ല.. അപകടസാധ്യത മുന്നില്‍ കണ്ട് വികസിത രാജ്യങ്ങള്‍ ഒഴിവാക്കിക്കൊണ്ടിരിക്കുന്ന സാങ്കേതികവിദ്യകള്‍ (ആണവ റിയാക്റ്റര്‍ ഉള്‍പ്പെടെയുള്ളവ) നമുക്കു വേണമോയെന്നു ഈ പുതിയ സാഹചര്യത്തില്‍ ഒരു വീണ്ടുവിചാരമുണ്ടായെങ്കില്‍ എന്നു ആശിച്ചു പോകുകയാണ്..

കൂട്ടത്തില്‍ അത്തരം ദുരന്തങ്ങള്‍ നമുക്കു മാത്രമല്ല ലോകത്ത് എവിടേയും ഉണ്ടാകാതിരിക്കട്ടെ എന്നു പ്രാര്‍ത്ഥിക്കാം..

http://library.thinkquest.org/17940/texts/nuclear_disasters/nuclear_disasters.html

ഗദ്ദാമ അഥവാ ഖദ്ദാമ

ഖദ്ദാമയാണ് ശരിയായ പദം എന്നു തോന്നുന്നു.. കാരണം അറബിയില്‍ ഗ എന്ന അക്ഷരം ഇല്ല..

അതു ആധികാരികമായി പറയാന്‍ നമ്മുടെ ഫേസ്ബുക്ക് പ്രവാസികള്‍ രംഗത്തുവരട്ടെ..

വര്‍ത്തമാനകാല സിനിമാ സംവിധായകരില്‍ മധ്യവര്‍ത്തി സിനിമകളിലേക്കു തിരിഞ്ഞ കമലിന്റെ ഏറ്റവും പുതിയ സിനിമ "ഗദ്ദാമ" പ്രമേയത്തിലും കഥാഗതി നിയന്ത്രണത്തിലും വ്യത്യസ്തത പുലര്‍ത്തി.. സമീപകാല മലയാള സിനിമകളുമായി താരതമ്യം ചെയ്യുമ്പോള്‍ പ്രത്യേകിച്ചും.. ഒരു സ്ത്രീയെ മുഖ്യ കഥാപാത്രമാക്കുകയെന്നതു തന്നെ വലിയ പരീക്ഷണമാണ്.. അതിനു ധൈര്യം കാണിക്കാന്‍ ഒരു രഞ്ജിത്തല്ലാതെ വേറെ സംവിധായകര്‍ ഉണ്ടാകുമെന്നു തോന്നുന്നില്ല..

ശ്രീനിവാസന്‍(റസാക്ക്) പ്രതിനിധാനം ചെയ്യുന്ന സാമൂഹ്യപ്രവര്‍ത്തകന്റെ സാമൂഹ്യപ്രവര്‍ത്തന വലിപ്പം കാണിക്കാന്‍ കെട്ടിടത്തില്‍ നിന്നു വീഴ്ത്തി കാലൊടിക്കുന്ന ഒരാളൊഴികെയുള്ള മുഴുവന്‍ കഥാപാത്രസൃഷ്ടിയും പ്രശംസനീയം തന്നെ.. ആ കഥാപാത്രവും അയാള്‍ക്കുവേണ്ടിയുള്ള ശ്രീനിവാസന്റെ സേവനവും യാഥാര്‍ത്ഥ്യബോധമില്ലാത്തതാണെന്നു മാത്രമല്ല കുറച്ചു exaggeratedഉം ആണ്.. ശ്രീനിവാസന്‍ ആണ് കാവ്യാമാധവന്‍(അശ്വതി) എന്ന ഗദ്ദാമയെ രക്ഷപ്പെട്രുത്താന്‍ ഉള്ള സാമൂഹ്യപ്രവര്‍ത്തകനെന്നു മനസ്സിലാക്കാന്‍ അതിനു മുന്‍പുള്ള റസാക്കിന്റെ രംഗങ്ങള്‍ തന്നെ ധാരാളം..

അശ്വതിയെന്ന ഗദ്ദാമയുടെ ഭാഗം കൃത്യതയോടെയും ഭംഗിയോടെയും കാവ്യാമാധവന്‍ അവതരിപ്പിച്ചു.(കാവ്യയുടെ രണ്ടാം വരവ് അതിഗംഭീരം).. രണ്ടാമതൊരു കുടുംബത്തിന്റെ കഷ്ടപ്പാടു കൂടി ഏറ്റെടുക്കുന്ന തീരുമാനമായിരുന്നു അശ്വതിയെ വിവാഹം ചെയ്യാനുള്ള ബിജുമെനോന്റെ തീരുമാനം.. വിദേശത്ത് പോയി രക്ഷപ്പെടാമെന്നു തീരുമാനിച്ച ബിജുമേനോന്റെ അപ്രതീക്ഷിത മരണം അശ്വതിക്കും രണ്ടു കുടുംബങ്ങള്‍ക്കും താങ്ങാവുന്നതിലും ഏറെയായിരുന്നു.. നിശ്ചയിക്കപ്പെട്ട വിദേശതൊഴില്‍ അശ്വതി ഏറ്റെടുക്കുന്നു.. വിദേശത്ത് വീട്ടുവേലക്കാരി.. ദുരിതക്കയത്തില്‍ നിന്നു കരകയറാമെന്ന ആഗ്രഹത്തോടെയെത്തുന്ന അശ്വതിയ്ക്ക് എയര്‍പോര്‍ട്ടില്‍ ഇറങ്ങുമ്പോള്‍ തൊട്ട് നേരിടേണ്ടി വരുന്ന ദുരിതം അവസാനം വരെയും പിന്തുടരുന്നു.. അറബി വീട്ടില്‍.. രക്ഷപ്പെടാനുള്ള ശ്രമത്തിനിടയില്‍.. ദിക്കറിയാതെയുള്ള അലച്ചിലുകള്‍ക്കിടയില്‍.. വിവിധ ഘട്ടങ്ങളില്‍.. രക്ഷ പോലും ശിക്ഷയാകുന്ന സന്ദര്‍ഭങ്ങള്‍.. പാപി ചെന്നേടം പാതാളം എന്നതിനു പകരം അശ്വതി ചെന്നേടം പാതാളം എന്നു തിരുത്താവുന്ന അനുഭവങ്ങള്‍.. അതിനിടയില്‍ ശ്രദ്ധേയമായ ഒരു കഥാപാത്രം ബഷീര്‍(പുതിയ നടന്‍).. ആടുകള്‍ക്കിടയില്‍ ആടുജീവിതം നയിക്കുന്ന ബഷീര്‍.. കാമവെറിയന്മാരില്‍ നിന്നും അവളെ രക്ഷിച്ച് സ്വയം ബലിയാടാകുന്നവന്‍.. അവന്റെ ജീവിതം കൊണ്ടു അവനുപോലും ഒരു ഗുണമില്ലെന്ന തിരിച്ചറിവാകാം അവനില്‍ ആ മാനവികത ഉണരാന്‍ ഹേതു.. അവന്റെ രൂപവും നിര്‍വികാര ഭാവവും ആണ് എന്റെ മനസ്സില്‍ തങ്ങി നില്ക്കുന്നത്.. വളരെ കുറച്ചു സമയം സിനിമയില്‍ പ്രത്യക്ഷപ്പെടുകയും ഏറ്റവും കൂടുതല്‍ പ്രേക്ഷകമനസ്സില്‍ സ്ഥാനം പിടിക്കുകയും ചെയ്തത് ബഷീറെന്ന കഥാപാത്രമായിരിക്കും..

ദുരിതത്തില്‍ നിന്നു ദുരിതക്കയത്തിലേക്കു വലിച്ചെറിയപ്പെട്ട അശ്വതി അവസാനം ജയിലില്‍ എത്തിപ്പെടുന്നു.. രക്ഷകനായ അന്യപുരുഷന്റെ വീട്ടില്‍ താമസിച്ചു എന്നതാണ് കുറ്റം.. അശ്വതിയേയും കൂടെ ജയിലിലടക്കപ്പെട്ടയാളെയും(കൊടിയേറ്റം ഗോപിയുടെ മകന്‍) റസാക്ക് പൂറത്തെത്തിക്കുകയും നാട്ടിലേക്ക് ഒരേ വണ്ടിയില്‍ കയറ്റി വിടുകയും ചെയ്യുമ്പോള്‍ അതു പ്രതീക്ഷയുടെ പുതുജീവിതത്തിലേക്കുള്ള പ്രയാണമാകുകയാണ്.. പുതുമയുള്ള പ്രമേയവും അവതരണവും സമീപനവും..

ഇത്രയോക്കെ ദുരിതങ്ങള്‍ ഉണ്ടാകുമോ.. സിനിമയ്ക്കു വേണ്ടി സൃഷ്ടിക്കപ്പെട്ടതാണോ.. സ്വന്തം തൊഴിലും ജീവിതവും കുടുംബവും മറന്ന് ഇത്തരത്തില്‍ സാമൂഹ്യപ്രവര്‍ത്തനം നടത്തുന്ന റസാക്കുമാര്‍ ഉണ്ടാകുമോ തുടങ്ങിയ സംശയങ്ങള്‍ പ്രേക്ഷകനു ചോദിക്കാം.. പ്രവാസികളായ സുഹൃത്തുക്കള്‍ മറുപടി പറയട്ടെ..

ഇന്ത്യക്കാര്‍ പാവങ്ങള്‍...

"ഇന്ത്യക്കാര്‍ ദരിദ്രരാണ്..പക്ഷേ ഇന്ത്യ ദരിദ്രമല്ല.."

ഈ വാക്കുകള്‍ സ്വിസ് ബാങ്ക് ഡയറക്ടര്‍മാരില്‍ ഒരാളുടേതാണ്..

280 ലക്ഷം കോടി ഇന്ത്യന്‍ പണം സ്വിസ് ബാങ്കില്‍ നിക്ഷേപിച്ചിട്ടുണ്ടെന്നു അദ്ദേഹം കൂട്ടിച്ചേര്‍ത്തു..

ആ തുകയുണ്ടെങ്കില്‍..

= ഇന്ത്യാ രാജ്യത്ത് 30 വര്‍ഷം നികുതിയില്ലാത്ത ബജറ്റ് നടപ്പിലാക്കാമായിരുന്നു..

= ഏതു വില്ലേജില്‍ നിന്നും ഡല്‍ഹിയിലേക്ക് 4 വരിപ്പാത ഉണ്ടാക്കാമായിരുന്നു..

= 500ല്‍ കൂടുതല്‍ സോഷ്യല്‍ പ്രോജക്റ്റുകള്‍ക്ക് സൗജന്യമായി വൈദ്യുതി നല്കാമായിരുന്നു..

= ഇന്ത്യയിലെ മുഴുവന്‍ പൗരന്‍മാര്‍ക്കും മാസം 2000രൂപ തോതില്‍ 60വര്‍ഷം നല്കാമായിരുന്നു..

= നമുക്ക് ഐ.എം.എഫിന്റേയും ലോകബാങ്കിന്റേയും ലോണ്‍ വേണ്ടിവരില്ലായിരുന്നു..

ചിന്തിക്കുക.. നമ്മുടെ പണം എങ്ങിനെയാണ് അഴിമതിക്കാരായ രാഷ്ട്രീയക്കാര്‍ ബ്ലോക്ക് ചെയ്തിരിക്കുന്നതെന്ന്..

അഴിമതിയില്‍ മുങ്ങിയ രാഷ്ട്രീയക്കാര്‍ക്കെതിരെ നിലയ്ക്കു നിര്‍ത്താന്‍ നമുക്ക് സമ്പൂര്‍ണ്ണ അവകാശമുണ്ട്..

ജനാധിപത്യ വ്യവസ്ഥയില്‍ അതു പ്രയോഗിക്കണം..

Take this seriously

All of us forwarding and sharing jokes, then why not this..?